جائزة النور للابداع الدورة الرابعة /الشعر الشعبي- الفائز الاول
.JPG)
النص الفائز بالمركز الاول
جائزة النور للابداع دورة الدكتورة آمال كاشف الغطاء
2011
سعدون التميمي
مقبرة الشمس
مرينة بيكم حمد يالمهرتك تابوت
وسمعنة دك إكهوة وشمينة ريحة موت
ياصوت مُر عالگبر مرعالگبر ياصوت
فزز إخوتي الغفوا كلهم وطنة إنباك
كلهم عشكهم دغش طلعت جذب الأشواك
فزز إخوتي الغفوا كلهم رجعنة زغار
ولاذكرى منهم بقت بس الصور تذكار
ومن كالوا إستشهدوا ظل ينزف البسمار
وأصرخ على المكبرة وراحوا يرد الصوت
يرد الصوت راحوا والشمس عنوان
بمقبرة الشمس مَر بيهم الزاتوت
يالكلك شهامة وگلي وين ألگاك
أصرخ بالمقابر ماترد الصوت
بس إنت أعله موتك أنه أحس محسود
وتمنه الموت مثلك كون هسه يموت
يالجرحك عراق ونزفك هلالين
يالمن نور وجهك يستحي التابوت
دفنت الموت بيدك والجرح جناز
يالمتعب الرصاص وعالمنايا تفوت
بجروحك شفت دم العراق يسيل
وحلگ جرحك أسمعه يشتم الطاغوت
شيصبرني عليك وفرگتك عمرين
وصبرك عالمقابر صبر شجرة توت
مايشبع الموت شكثر ياكل ناس
بس بيك إكتفه وسد باب حلگة الموت
ينازف غيرة الله بآية العباس
وبغير الشهادة أبد ماتقنع
بعيونك منية إتعب الجناز
وللموته الشريفة عُمر تتطلع
يالتنزف شعر بأقلام اليكتبون
وكل طعنة أعله صدرك تنحسب مطلع
ياماأدري شنهي وآنه أشوفك سيف
بحبال المذلة بكل وگت تگطع
ياصدر القصيدة بزحمة الأفكار
أشوفن صورتك فوك الورق تطلع
تعنيت المنية ومهرتك تابوت
مرجع للشهادة وگلت ماأرجع
ماحسك متت لن عايش إنت وياي
بنص گلبي وضميري وشاغل إحساسي
ياأول شهيد بخاطري مدفون
ياأغلة وأعز من كل هلي وناسي
يالإسمك علم مرتفع فوك الغيم
شمادنگ أبوسك يرتفع راسي
ليست هناك تعليقات:
إرسال تعليق